TikTok воведе текстуални објави

Апликацијата за видео стриминг TikTok сега нуди можност за објави само со текстуална содржина, со што стана уште еден технолошки гигант во серијата што одговори на платформата X, односно поранешниот Твитер.

TikTok вели дека новата функција им дава на корисниците друг начин да се изразат. Претходно овој месец, TikTok лансираше нова услуга за стриминг за да се соочи со ривалите како Spotify и Apple Music. Промената доаѓа откако Твитер го отфрли познатото лого на сината птица и го замени со црно-бела буква X.

На корисниците на TikTok сега ќе им бидат понудени три опции во апликацијата, имено опција за објавување фотографии, клипови или текст. Тие исто така ќе можат да уредуваат објави со додавање звук, локации или дуети, кои се видео реакции на објавите на другите корисници.

„Овие способности ги прават текстуалните објави динамични и интерактивни како и сите фотографии или клипови“, рече TikTok.

Промените доаѓаат неколку недели откако TikTok, која е во сопственост на кинеската компанија ByteDance, лансираше нова услуга за стриминг музика наречена TikTok Music во Индонезија и Бразил. Минатата недела бета верзијата пристигна во Сингапур, Мексико и Австралија. Компанијата вели дека ќе им овозможи на корисниците „да слушаат, споделуваат и преземаат музика што ќе ја откријат на TikTok, како и да ги споделат своите омилени песни со нивната заедница на TikTok“.

Апликацијата исто така тестира новини како што е новиот пејзаж режим на одредена група корисници ширум светот.

Популарните платформи за социјални медиуми како Facebook, Instagram и Threads, како и X, веќе поддржуваат текстуални објави.