БРИСЕЛ БАРА НАЧИН ЗА КОРИСТЕЊЕ НА РУСКИ СРЕДСТВА: ЕУ ќе се обиде да ја финансира обновата на Украина со замрзнатите средства на Москва

Европската унија денеска соопшти дека сака да најде начин да ги искористи руските средства замрзнати во западните земји за финансирање на обновата на Украина, мерка што ја бара Киев, но правно сложена за спроведување.

„ЕУ ќе ги интензивира напорите да ги користи замрзнатите руски средства за поддршка на реконструкцијата на Украина и за целите на репарациите, во согласност со европското и меѓународното право“, се вели во заедничката изјава на претседателот на Европскиот совет, Шарл Мишел и претседателот на Европската комисија, Урсула фон дер Лајен, по самитот во Киев со украинскиот претседател Володимир Зеленски.

Во Киев, ЕУ ги поздрави „големите напори“ на Украина во нејзината обид да се приклучи на Унијата, но не ги објави следните чекори во процесот.

„Унијата ги препозна големите напори што Украина ги направи во последните месеци за да ги постигне целите на нејзиниот кандидатски статус за членство“, рече Мишел.

Претседателот на Европскиот совет рече дека Украина е Европската унија и дека Европската унија е Украина.

„Иднината на Украина е со ЕУ“, рече Мишел.

Зеленски, од своја страна, рече дека Украина не сака да изгуби ниту еден ден во процесот за членство во ЕУ.

„Нашата цел е апсолутно јасна, а тоа е да ги започнеме преговорите за членство на Украина. Нема да изгубиме ниту еден ден во нашата работа за приближување на Украина и ЕУ“, рече Зеленски.

Зборувајќи за оружјето, Зеленски рече дека на Украина и треба брза испорака на оружје со долг дострел за силите да вратат дел од Донбас од руски раце.