ВО ЈАПОНИЈА СЕ ПОВТОРУВА СТРАШНО СЦЕНАРИО ОД ТУРЦИЈА: Спасувачите се обидуваат да стигнат до затрупаните во урнатините на ниски температури
Трка со времето, така спасувачите и политичарите во Јапонија ја опишуваат моменталната ситуација, бидејќи земјата е погодена од неколку разорни земјотреси. Најсилниот регистриран земјотрес се случи во близина на префектурата Ишикава – 7,5 степени според Рихтеровата скала.
Сцени на уништување беа снимени долж западниот брег на Јапонија додека спасувачите се обидуваа да ги спасат граѓаните затрупани во урнатините на земјотресот со јачина од 7,5 степени според Рихтеровата скала што предизвика повеќе последователни потреси и однесе десетици животи.
Најмалку 64 лица загинаа во разорниот земјотрес што ја погоди Јапонија на 1 јануари, а урнатините и оштетените патишта се уште ги спречуваат спасувачките служби да спроведат операции за пребарување и спасување на преживеаните, јавуваат јапонските медиуми.
Поради дождот кој, како што е најавено во подрачјата погодени од земјотресот, ќе паѓа до четврток, јапонската метеоролошка агенција предупреди на потенцијални одрони.
Јапонската војска (СДФ) користеше хеликоптери за доставување на основните материјали до отсечените области, а локалните власти побараа од централната влада да испрати дополнителен воен персонал за да помогне во спасувачките напори.
Премиерот Фумио Кишида на денешната прес-конференција потврди дека Владата одлучила да го зголеми бројот на војници во регионот погоден од земјотресот од сегашните илјада на две илјади. Кишида се состана со новинарите еден ден откако на аеродромот Ханеда во Токио се судрија авион на Џапан ерлајнс и авион на јапонската крајбрежна стража што превезуваше хуманитарна помош за Ваџима.
Епицентарот на разорниот земјотрес бил на околу 30 километри источно-североисточно од Ваџима на длабочина од 16 километри и регистрирал највисоко ниво од 7 единици на јапонската скала со сеизмички интензитет, наведуваат надлежните служби и потсетуваат дека ваков силен земјотрес бил последно снимен во 2018 година на Хокаидо.
