Германија потфрли: „Го допревме дното…“

И ова лето Германија не успеа да го фати економскиот моментум и потона во рецесија.

Ова во понеделникот го соопшти Федералното биро за статистика.

Според податоците без сезонски и инфлаторни влијанија, бруто домашниот производ од почетокот на јули до крајот на септември е за 0,1 отсто помал во однос на третиот квартал од 2022 година.

Економистите и владата сега очекуваат дека Германија ќе остане во минус оваа година и дека закрепнувањето ќе започне дури следната година.

Во првиот квартал БДП сепак порасна, макар и за кревки 0,1 отсто, а во вториот стагнираше. Приватната потрошувачка се намали оваа година и тоа ги надмина позитивните импулси од индустријата за оружје и автомобилска индустрија.

Инфлацијата, иако стивнува, според статистичарите останува силна кочница за економското закрепнување, бидејќи ја нагризува куповната моќ на потрошувачите и нивната подготвеност за трошење.

„И покрај повлекувањето на инфлацијата, очекуваме бавно закрепнување на приватната потрошувачка, бидејќи потрошувачите се уште имаат недоверба“, оценуваат економистите на Дојче банк.

Годишната стапка на инфлација во септември падна на 4,5 отсто, по 6,1 отсто во август, но цените на храната повторно пораснаа.

Друга важна кочница е интересот. Имено, централните банки, вклучително и европските, ја потиснуваат инфлацијата со ладење на побарувачката со зголемување на каматните стапки. Ова ја покачува цената на кредитите, а потрошувачката и инвестициите се колатерална штета.

Најголема жртва на високата каматна стапка, која дојде со огромно поскапување на материјалите, е станбениот сектор во Германија.

Конечно, извозно ориентираната германска економија исто така страда од слабоста на светската економија.

И покрај се, расположението во германската економија се разубави во октомври, за прв пат од април. Во важната месечна анкета на економскиот институт Ifo, домашните компании позитивно ја оценија и моменталната состојба и деловните перспективи за наредните месеци.

Водечките економски институти очекуваат дека Германија ќе ја заврши годината со рецесија од 0,6 отсто. На почетокот на годината прогнозираат слаб раст од 0,3 отсто. За 2024 година сега прогнозираат раст од 1,3 отсто.

Владата, пак, годинава очекува малку поумерен пад на БДП од 0,4 отсто, додека нејзините очекувања за следната се совпаѓаат со проценките на економистите.

„Го допревме дното…и сега е се подобро“, изјави неодамна министерот за економија Роберт Хабек.