ГОЛЕМО ЗАГАДУВАЊЕ? – Вознемирувачки снимки: „Неретва побеле, животот во реката престана да постои“
Организациите кои се занимаваат со заштита на животната средина наведуваат дека тоа се случува поради изградбата на нова хидроцентрала.
Една од најубавите реки не само во Босна и Херцеговина, туку и во Европа, станува непрепознатлива. Организациите кои се занимаваат со заштита на животната средина наведуваат дека сето тоа е благодарение на изградбата на нова хидроцентрала.
Центарот за животна средина на крајот на септември објави застрашувачки снимки од Неретва на места во близина на Улог, каде што се гради хидроцентралата, пренесува Klix.ba.
Од видеата се гледа дека реката добила бела боја, според мештаните и рибарите имало помор на риба на неколку локации на делница од неколку километри, а во подолгиот дел од водотекот Неретва, според нив, „ животот во реката престана да постои“.
– Неодамна бев на терен и Центарот за животна средина објави фотографии од локацијата кај градот Улог, каде што се гради хидроцентралата. Очигледно е дека има огромна заматеност каде што водата е целосно бела. Можно е да се работи за адитиви од градилиштето, цементни подлоги. Ја алармиравме инспекцијата да излезе на терен и да утврди за што се работи, изјави Владимир Топиќ од Центарот за животна средина.
Тој рече дека е многу можно промената на бојата на водата во Бан Вир да е поврзана со истиот проблем, затоа би било добро кантоналната или општинската инспекција да излезе на терен и да утврди за што се работи.
– Се планира изградба на хидроцентрала во Главатичево и во Бјелимиќи. Кога ќе видиме колку една хидроцентрала која се уште не е изградена и штети на реката и населението, тогаш може да се запрашаме што би се случило доколку се изградат толку електрани. Предметната вода е за пиење сè до Коњиќ, на растојание од 90 километри. Таму живеат и специфични видови риби, како што е пастрмката со меки усни, која е исклучително вреден вид и која сега умира. Таков вид не можеме да најдеме никаде во светот, рече Топиќ.
Фондацијата Студио за социјални промени соопшти дека познатиот Бан Вир станал непрепознатлив.
– Иако имаше период на стабилни временски услови, без врнежи, вака денеска изгледа реката Неретва. Фотографиите се направени во Главатичево, возводно од Коњиќ. Имајте предвид дека неколку десетици километри возводно, во непосредна близина на линијата на ентитетот, на разнишан и нестабилен терен, се гради хидроелектраната „Улог“, велат од Фондацијата.
