ДАЛИ СЕРГЕЈ ЛАВРОВ ЌЕ ДОЈДЕ ВО МАКЕДОНИЈА !? Министерскиот состанок на ОБСЕ во Скопје започнува на 29. ноември, а одговор нема
Можните кандидати за претседавач на Организацијата за безбедност и соработка во Европа – ОБСЕ за 2024 година ќе биде една од темите на Состанокот ЕУ – Западен Балкан што ќе се одржи попладнево во Брисел со кој ќе претседава високиот претставник на ЕУ за надворешни работи и безбедност Жосеп Борел, соопшти министерот за надворешни работи, Бујар Османи.
„Значи и денеска се одвиваат тие разговори. Во Брисел една од темите на Советот за надворешни работи е исто така ова прашање, односно кој е ставот на земјите членки на ЕУ по однос на кандидатурите на земјите членки. Упорно работиме, во комуникација сум со повеќето министри за надворешни работи. Се надеваме дека во текот на неделата ќе се расчистат одредени дилеми за да можеме да зборуваме за конкретно решение за иден претседавач. Доколку нема, веројатно одлуката ќе биде донесена во Скопје. Дали тоа ќе биде друга земја членка, дали ќе биде Северна Македонија, ќе одлучи Министерскиот совет во Скопје. Јас се надевам дека сите министри за надворешни работи ќе успеат да бидат присутни во Скопје“, вели Бујар Османи во одговор на новинарско прашање, кој како претседавачот со ОБСЕ го отвори состанокот на Експертската мрежа на ОБСЕ во Скопје.
Прашан дали имаат комуникации со Кабинетот на министерот за надворешни работи на Русија, Сергеј Лавров, и дали ќе присуствува на Министерскиот состанок на ОБСЕ во Скопје, Бујар Османи посочи дека се уште нема потврда за доаѓањето на Сергеј Лавров во Скопје.
„Ние ги процесуираме барањата на сите членови на руската делегација за визи и за доаѓање во Северна Македонија. Во моментот кога ќе имаме решение сигурно ќе информираме“, посочи министерот Бујар Османи.
Во однос на учеството на Русија на Министерскиот состанок на ОБСЕ, Бујар Османи минатата недела на средба со новинарите кажа дека добил писмо од рускиот министер Сергеј Лавров во кое покажал интерес и барање да се обезбеди негово присуство во земјава, но оти, во однос на тоа постојат, рече, одредени предизвици, бидејќи македонскиот воздушен простор е затворен за државни руски авиони.
На Министерскиот состанок на ОБСЕ што ќе се одржи во Скопје од 29. ноември до 1. декември ќе учествуваат 76 делегации од земји-членки и партнери на ОБСЕ, а се очекуваат околу 1.000 гости.
