„ДЕЦАТА ПЛАЧАТ, КЛАСНАТА ГИ СМИРУВАЛА“ Откако бил пронајден нож во ранецот на осмоодделенец, учениците од „Рибникар“ биле во страв, еве што напишале родителите по инцидентот
Смиреност, паника, страв…вака накратко можете да го опишете денешниот ден во ОУ „Владислав Рбиникар“ откако во ранецот на ученик од осмо одделение бил пронајден нож. „Блиц“ имал пристап до пораките од групата на родители кои покажуваат како реагирале родителите и децата по инцидентот што се случил.
Речиси и да нема група на Вибер во која не се разговарало за овој настан, од петто до осмо одделение.
“Ужас, децата плачат. Настава нема “, напишала една од мајките.
Како што може да се види од разменетите пораки, за страшниот настан меѓусебно комуницирале родители на деца од повеќе одделенија. Некои од нив ги пренесоа зборовите на класниот раководител на момчето кај кое бил пронајден ножот.
„Разговарав накратко со класната раководителка. Таа праша дали сите деца се многу вознемирени, дека разговарала со нив за да ги смири и да ги пушти дома. Полицијата е во училиштето, па властите ја презеле целата ситуација заедно со училиштето“, се наведува во една од пораките.
Таткото на момчето тврди дека ножот бил подметнат
Во интервју за „Блиц“, таткото на детето кое учи во основното училиште „Владислав Рибникар“ вели дека родителите на момчето кај кое наводно бил пронајден ножот тврдат дека му бил подметнат. Кога слушнал што се случило веднаш дошол да го земе детето бидејќи живеат на две минути од училиштето.
– Децата разговараат меѓу себе, па мојот син кој посетува петто одделение доби информација дека таткото на момчето кое беше пронајдено со нож дошол на училиште и почнал да вика дека некој му ставил нож во чантата на неговото дете. Што навистина се случило таму, дали се случило или не – никој од нас не знае бидејќи не бевме присутни. Но, веруваме дека има нешто, бидејќи голем број деца се преплашени и испаничени – изјави тој за „Блиц“.
Да потсетиме, училишниот полицаец од Основното училиште „Владислав Рибникар“ пронашол нож во ранецот на еден од учениците.
Како што дознаваме, во училиштето немало никакви инциденти и момчето кое го имало ножот било приведено во полициска станица. Оваа информација за „Блиц“ ја потврдил еден од родителите на децата кои учат во ОУ „Владислав Рибникар“ .
– Кај еден од учениците од училиштето, осмоодделенец, пронајден е нож, но немало никаков инцидент. На детето му го одзеле ножот, а на децата им било дозволено да си одат дома. Децата се доволно трауматизирани и тоа им е уште потешко. Како родители секако дека се грижиме, но мораме да се погрижиме училишната средина да биде безбедна за нашите деца – изјавил претходно за „Блиц“ еден од родителите.
