ДОГОВОР ВО ВИЕНА – Картелот на земји извознички на нафта донесе важна одлука: „Решивме да се ги забибериме работите“
Членките на ОПЕК ќе го продолжат договорот за намалување на производството до крајот на следната година
Организацијата на земјите извознички на нафта (ОПЕК) и нејзините сојузници одлучија во неделата на состанокот во Виена да го продолжат договорот за намалување на производството до крајот на следната година со цел да се стабилизираат цените.
Во 2022 година, ОПЕК + одлучи да го намали производството за два милиони барели дневно, а од мај, некои негови членки доброволно го намалија за дополнителни 1,66 милиони барели дневно. Новиот режим на производство требаше да остане на сила до крајот на годината.
На редовниот состанок во неделата, по неколкучасовни преговори, тие одлучија да го продолжат до крајот на 2024 година и од јануари да го намалат производството за уште 1,4 милиони барели дневно, на 40,46 милиони барели дневно.
Новите квоти реално нема да значат помало производство за сите членки. Така, Русија, Нигерија и Ангола веќе произведуваат помалку, а групата само ги приспособи своите квоти на вистинското ниво на производство.
Саудиска Арабија ќе го намали од јули од 10 на 9 милиони барели дневно.
„Сакавме да додадеме шлаг на тортата. Секогаш сакаме да додадеме доза на тензија, не сакаме луѓето да погодуваат што ќе правиме… На пазарот му е потребна стабилизација“, изјави саудискиот министер за енергија, принцот Абдулазиз бин Салман Ал Сауд на прес-конференција.
Саудиска Арабија е единствената во ОПЕК + која има доволно резерви и капацитет за складирање за да го намали или зголеми производството без поголеми тешкотии.
„Саудијците им се заканија на шпекулантите дека ќе ги намалат и тоа го направија. Тие очигледно сакаат повисоки цени“, објаснува Гери Рос од Black Gold Investors.
Според новиот договор, Обединетите Арапски Емирати ќе можат да го зголемат производството за околу 200.000 барели дневно, на 3,22 милиони барели дневно.
