До 2050 година, повеќе од 1,3 милијарди луѓе ќе имаат дијабетес – докторите предупредуваат: “Ситуацијата е алармантна!“

Бројот на возрасни кои страдаат од дијабетес ќе се удвои до 2050 година, покажува истражувањето објавено во научното списание The Lancet. 

Според новите проценки, бројот на пациенти ќе се зголеми од 529 милиони (2021 г.) на повеќе од 1,3 милијарди во 2050 година, а стапката на заболени не се очекува да се намали во ниту една земја во следните 30 години, пишува весникот The Guardian.

Експертите ги прогласија овие податоци за алармантни, тврдејќи дека дијабетесот ги надминува повеќето болести во светот и претставува значајна закана за населението и здравствените системи.

„Дијабетесот е една од најголемите закани на нашето време, се очекува агресивно да расте во следните три децении во сите земји, старосни и полови групи, што ќе биде тешко да се справи со здравствените системи“, вели Шивани Агарвал од Универзитетот во Њујорк.

Според проценките на Обединетите нации, до 2050 година светската популација ќе биде околу 9,8 милијарди луѓе, што значи дека секој седми или осми човек ќе живее со дијабетес.

„Дијабетесот тип 2, кој е одговорен за повеќето случаи на дијабетес, во голема мера може да се спречи. Во некои случаи, тоа е дури и реверзибилно ако се открие и третира во рана фаза на болеста. Сепак, сите истражувања покажуваат дека преваленцата на дијабетес се зголемува во светот, пред се поради зголемувањето на дебелината“, пишуваат авторите на студијата.

Исто така, стапките на дијабетес се во пораст поради структурниот расизам со кој се соочуваат малцинските етнички групи и географската нееднаквост, а болестите и смртните случаи предизвикани од нив исто така се во пораст. Луѓето од маргинализираните заедници имаат помали шанси да пристапат до основните лекови, како што е инсулинот. Како резултат на тоа, тие имаат послаба контрола на шеќерот во крвта, понизок квалитет на живот и скратен животен век.