Екстремните врнежи ќе бидат посилни и почести
Интензитетот и зачестеноста на екстремните врнежи експоненцијално се зголемуваат со глобалното затоплување, што значи дека периодите на исклучително обилен дожд, што може да резултира со катастрофални поплави, стануваат се почести и поинтензивни како што се загрева планетата, а последиците би можеле да бидат многу потешки од очекуваното, покажа истражувањето на Институтот за истражување на климатските влијанија во Потсдам (ПИК).
Со цел да се предвидат какви ќе бидат последиците од климатските промени, научниците користат климатски модели, но се покажа дека овие најсовремени климатски модели значително го потцениле степенот до кој екстремните количини на врнежи се зголемуваат под влијание на глобалното затоплување. Ова значи дека екстремните количини на врнежи би можеле да се зголемат многу побрзо отколку што предвидуваат климатските модели.
„Нашето истражување укажува дека последиците би можеле да бидат многу потешки отколку што мислевме на почетокот“, изјави еден од авторите на студијата, Андерс Леверман од Институтот во Потсдам.
„Екстремните дождови ќе бидат посилни и почести, а општеството мора да се подготви за тоа“, додаде тој.
„Нашата студија потврди дека интензитетот и зачестеноста на екстремно обилните врнежи се зголемуваат експоненцијално со глобалното затоплување“, објаснува Макс Коц, водечки автор на студијата објавена во Journal of Climate.
Во својата истражувачка работа, научниците споредувале симулации на бројни климатски модели со историски набљудувања на промените. Тие користеа техники кои им овозможија да филтрираат кои промени се поврзани со емисиите на стакленички гасови, кои се предизвикани од луѓето, а кои не.
„Нашата студија потврдува дека интензитетот и зачестеноста на обилните дождови се зголемуваат експоненцијално со секое зголемување на глобалното затоплување“, рече Коц, додавајќи дека анализите покажале дека на овие промени најмногу влијае порастот на температурата, а не и други фактори како што се ветровите.
Тропските региони и повисоките географски широчини, како Југоисточна Азија и северна Канада, ќе бидат најтешко погодени од промените.
Феноменот е поврзан со фактот дека потоплиот воздух може да задржи повеќе водена пареа.
Промените во зачестеноста и интензитетот на дневните екстремни врнежи на копно може да влијаат на социјалната благосостојба, економијата и социјалната стабилност, со оглед на нивната поврзаност со поплавите, но и достапноста на подземните води, што може да резултира со човечки жртви и значителни финансиски загуби.
„ Добрата вест е што ова знаење ни го олеснува предвидувањето на иднината кога има настани со екстремни врнежи. Ноимаме и лоша: ќе биде уште полошо ако продолжиме да го поттикнуваме глобалното затоплување со емисиите на стакленички гасови“, рече Андерс Леверман.
