Калиопи воодушеви со својата енергија на концертот во Сараево: Во еден момент се симна од сцената и ја прегрна публиката

Македонската дива Калиопи вечерва настапува во Домот на млади во Сараево, каде што ја воодушеви публиката со енергичен настап.

Препознатлива по својот раскошен вокал, Калиопи вечерва во Сараево ги изведе своите најголеми хитови.

На музичката дива на сцената и се придружи Жељко Самарџиќ кој со неа ја изведе дуетската песна „Знам“.

Она што особено ги воодушеви присутните е нејзината неверојатна енергија, а пејачката во еден момент воодушевено се спушти меѓу присутните и ги прегрна и со задоволство направи селфи фотографии. Покрај аплаузи и овации, Калиопи доби и цвеќе од публиката.

„Ми недостига Сараево штом знам дека морам да го напуштам… Токму затоа секое враќање во овој град е дар на живот. Сараевската публика не ја доживувам како барана, туку реална. Тоа е публика која има вграден став кон тоа што сака, а што не. Нека се радуваат слободно, затоа што ќе имаме празнична атмосфера! Им подготвувам концерт 10 животи“, изјави пејачката во интервју за Klix.ba. најавувајќи го концертот.

Покрај добрата музика, Калиопи за сараевчани подготви и специјална изложба „Дона“ на сараевската уметница Алма Коњичанин, која ќе можат да ја погледнат за време на концертот и да создадат добро дело.

Имено, изложбата е на продажба, а на иницијатива на Алма Коњичанин и Калиопи, целиот приход од вечерашната продажба на сликите ќе биде дониран на здружение кое ги обединува жените болни од рак.

Инспирација за секоја од 17-те слики се песните на Калиопа, а секоја слика претставува по една песна.