„Луксузен мраз“ е новиот тренд на TikTok (ВИДЕО)

Коцките мраз направени од кафе, енергетски пијалоци, овошни сокови или со парчиња овошје се новитет во правењето коктели. Трендот на TikTok ја покажува убавината во секојдневните предмети, дури и во оние што брзо се топат.

Во последните неколку месеци многу инфлуенсери поставуваат необични начини за разубавување на секојдневието. Покрај естетски привлечните полици во фрижидерот , во тренд се и разубавените коцки мраз.

Во септември, корисничката на TikTok, Џуни Ким, објави видео во кое се прикажани нејзините различни форми на мраз, направени од различни пијалоци или овошја. Оттогаш, видеото го погледнале над триесет милиони луѓе и таа продолжи да ги покажува своите разубавени коцки мраз на интернет. Многумина беа воодушевени и „луксузниот мраз“ набрзо стана нов тренд.

Канадскиот миксолог Френки Соларик објасни за Глоуб и Меил дека првпат видел рачно издлабени коцки мраз во Јапонија пред повеќе од десет години, па почнал да експериментира со различни форми и вкусови.

“Со развојот на социјалните мрежи, многу луѓе се заинтересирани за интересни процеси на правење коктели, луѓето учат како да прават различни пијалоци дома. Има и функционална страна на различни форми на мраз. На пример, многу големи коцки мраз или топки се користат за појаки пијалоци, бидејќи нема да се стопат премногу брзо“, објасни Соларик, додавајќи дека естетиката е секогаш важна за клиентите како дел од целокупното коктелско искуство.

Многу инфлуенсери се приклучија на трендот, гордо прикажувајќи го својот мраз кој може да се направи од кафе, енергетски пијалоци, овошни сокови или со парчиња овошје, јадлив сјај… Иако трендот можеби на некои им изгледа како „премногу“ работа, постои друга функционална намена. На пример, разредувањето на пијалок како што е кафето може да се спречи со користење на ладно сварено кафе наместо вода, што ќе го излади пијалокот, но ќе го зачува вкусот.

На крајот, многумина веруваат дека само естетиката може да биде сосема доволна причина да се испроба овој тренд. Луѓето природно ја бараат убавината, дури и во секојдневието, а ако „луксузниот мраз“ е одговорот за подобро расположение во текот на денот, тогаш можеби е добра идеја да вметнете неколку парчиња портокал во калапот кога ги правите следните коцки.