Милановиќ: Ќе продолжам да се залагам за што побрз влез на Албанија во ЕУ

– Хрватскиот претседател Зоран Милановиќ денеска му рече на албанскиот премиер Еди Рама дека ќе продолжи да се залага за „што е можно побрз влез на Албанија во Европската унија“, земја што ја опишува како „доверлив сојузник во НАТО долго време“.

Хрватскиот претседател го прими албанскиот премиер во Пантовчак и ја повтори цврстата и континуирана поддршка на Хрватска за Тирана за членство во ЕУ, се вели во соопштението од Кабинетот на хрватскиот претседател.

Милановиќ и Рама разговарале за соработката меѓу Хрватска и Албанија и ги оцениле односите меѓу двете земји како „исклучително пријателски и добри“.

Тема на разговорот била и безбедносната и политичката состојба во Југоисточна Европа, при што беше истакнато дека зачувувањето на мирот и стабилноста во регионот е од голем интерес за двете земји, се вели во соопштението.

Рама е во официјална посета на Хрватска, а претходно беше примен од премиерот Андреј Пленковиќ.