На Европа и се заканува невреме: Се очекуваат најголемите поплави во последните 110 години, неколку земји се подготвуваат за хаос (ВИДЕО)
Метеоролошката канцеларија во Велика Британија издаде црвено предупредување за делови од Шкотска
Голем дел од северна Европа се подготвува за бура која доаѓа од исток, а властите предупредуваат дека поплавите би можеле да предизвикаат големи проблеми во Данска, Балтичкото Море и северна Велика Британија.
Данската телевизија ТВ2 соопшти дека регионот најверојатно ќе биде погоден од најлошите поплави во последните 110 години, а данскиот метеоролошки институт соопшти дека брановите би можеле да достигнат четири метри долж источниот брег.
Метеоролошката канцеларија во Велика Британија издаде црвено предупредување за делови од Шкотска бидејќи денеска и утре се очекуваат обилни врнежи, како и можност за поројни поплави опасни по живот.
Последната црвена тревога во ОК беше издадена во 2020 година.
Во Ирска бурата Бабет , придружена со обилни врнежи, доведе до поплави во неколку градови и села, а некои области денеска останаа под вода и без струја.
Во Данска, жителите поставија вреќи со песок долж критичните области. Полицијата во јужна Данска ги повика луѓето долж источниот брег да ги напуштат погодените области бидејќи куќите, пристаништата и другите места може да бидат поплавени. Полицијата предупреди дека патиштата може да бидат блокирани.
Аеродромот во Копенхаген и државната железничка компанија на Данска предупредија дека во петок може да има откажувања и доцнење на сообраќајот поради лошите временски услови.
Неколку фериботи меѓу данските острови беа прекинати, како и траектите до Росток во северна Германија и до Осло.
Шведските метеоролози издадоа и предупредување за јужниот брег од петок навечер и за сабота. Тие рекоа дека нивото на водата во јужните делови на Шведска би можело да го достигне највисокото ниво од 1990-тите.
Во Германија, властите предупредија на високи нивоа на водата во заливите во Шлезвиг-Холштајн, јужно од границата со Данска, до средината на саботата.
