НЕВЕРОЈАТЕН НЕУСПЕХ ВО ШПАНИЈА: За 258 милиони евра купени возови преголеми за постоечките тунели
За 258 милиони евра Шпанија купила возови кои се преголеми за постоечките тунели, поради што ќе треба да се повтори целиот долгорочен процес на набавка.
Откако големата грешка ја откри Ел Комерсио на крајот на минатиот месец, две лица добија отказ. Националната железничка компанија Ренфе нареди 31 приградски воз во 2020 година за да ги заменат застарените возови во слабо поврзаните провинции Астурија и Кантабрија на северот на земјата.
Завршувањето на обновата на возниот парк беше планирано за 2024 година, но најверојатно ќе биде продолжено до 2026 година. Исто така, се покажа дека шпанскиот производител CAF ја посочи грешката во март 2021 година. Мигел Анхел Ревиља, претседател на провинцијата Кантабрија , грешката ја нарече неискажлива глупост.
Кој е виновен?
Како што објави Еуроњуз, неколку актери се одговорни за грешката, вклучувајќи ги Ренфе, КАФ, јавното претпријатие кое управува со железничката инфраструктура Адиф и Државната агенција за безбедност на железницата (АЕСФ). Откако работата му беше доверена на CAF, Ренфе обезбеди мерења врз основа на спецификациите за кои тврди дека биле обезбедени од Адиф. CAF подоцна предупреди дека спецификациите можеби не се точни.
Железничката мрежа во споменатиот дел на Шпанија е изградена во 19 век и се протега над планинскиот предел. Составен е и од тунели со различни димензии кои не се еднакви на стандардизирани, модерни димензии. Еден од директорите на Ренфе и шефот на инспекцијата на Адиф беа отпуштени.
Министерката за транспорт Ракел Санчез изјави дека неодамна станала свесна за проблемот. Таа започна внатрешна ревизија за тоа кој знаел дека проблемот постои и зошто димензиите на возовите не биле разгледани порано. Генералниот секретар за инфраструктура Ксавиер Флорес призна дека за овој проблем дознал пред неколку месеци.
Што ќе биде со нарачаните возови?
Со оглед на тоа што возовите се уште беа во фаза на проектирање, нивното производство не беше завршено. Целиот долг процес ќе треба да се повтори. Во повторениот процес ќе се користат димензиите на постоечките возови. Адиф ќе мора да ги ажурира податоците за да не се повтори овој проблем.
Слична грешка во Франција во 2014 година
Ова не е прв пат да се случи ваква грешка – во 2014 година, француската железничка компанија SNCF нарача 2.000 возови кои беа премногу широки. И тогаш грешката е предизвикана од тоа што не се зема предвид постоечката состојба. Меѓутоа, во овој случај возовите веќе беа изградени, поради што мораше да се изградат нови платформи кои чинат многу, пишува Euronews .
