НЕВООБИЧАЕНА БУРА ОД ГРАД ЈА ПОГОДИ АЛЕКСАНДРИЈА, ЕГИПЕТ: Град удрил по прозорците, луѓето бегале од кафулињата
Силна бура проследена со град, невообичаена за оваа сезона, го погоди египетскиот медитерански град Александрија претходната ноќ , поплавувајќи ги патиштата и оштетувајќи продавници по должината на брегот, во нова епизода на лоши временски услови што го зафати регионот.
Бурата го погоди градот претходната ноќ и ги принуди луѓето да бегаат од кафулињата каде што град удираше по прозорците , додека молњите го осветлуваа небото, јави дописникот на агенцијата Франс прес. Подземните премини беа поплавени.
Гувернерот на Александрија, Ахмед Халед Хасан, го подигна нивото на тревога, а тимовите за итни случаи работеа во текот на целото утро за да ги одвлечат оштетените возила и да ги расчистат остатоците. Не е пријавена ниту една жртва, соопшти Министерството за здравство.
Дождовите се вообичаени на медитеранскиот брег на Египет во текот на зимата, но локалните медиуми ја опишаа вечервашната бура како нешто без преседан.
Според научниците, екстремните временски настани стануваат сè поверојатни со климатските промени, што доведува до зголемени суши, но и до посилен интензитет и поголема непредвидливост на врнежите.
Александрија, најголемиот крајбрежен град во Египет, е особено ранлив на климатските промени. Веќе ги претрпе последиците од крајбрежната ерозија, зголемувањето на нивото на морето и поплавите предизвикани од бури. Нивото на Средоземното Море би можело да се покачи за еден метар во текот на првите три децении, според најпесимистичките предвидувања на Меѓувладиниот панел на ОН за климатски промени (GIEC).
Според други пооптимистички сценарија, Медитеранот ќе порасне за 50 сантиметри до 2050 година. Потоа триесет проценти од територијата на Александрија ќе биде поплавена, една четвртина од нејзините шест милиони жители ќе мора да се преселат, а 195.000 работни места ќе бидат изгубени. Властите веќе презедоа напори за да се обидат да го минимизираат влијанието на затоплувањето на климата, особено со изградба на огромна брана од бетонски блокови по должината на брегот.
