НОВИОТ ЗАКОН – Русија ја зголеми старосната граница за задолжителен воен рок од 27 на 30 години
Оваа мерка ќе овозможи значително зголемување на бројот на активни руски војници, без нова мобилизација на потенцијалните резервисти
Руските пратеници во вторникот го одобрија нацрт-законот со кој ќе се зголеми горната граница за задолжителна воена служба од 27 на 30 години, бидејќи агресијата против Украина влегува во својот осумнаесетти месец.
„Од 1 јануари 2024 година, граѓаните на возраст меѓу 18 и 30 години ќе бидат повикани на воена служба“, пишува во законот, кој беше прифатен од Думата, Долниот дом на рускиот парламент, во второто и третото читање, што е најважната фаза во донесувањето на законите во земјата.
Оваа мерка ќе овозможи значително зголемување на бројот на руски активни војници, без нова мобилизација на потенцијални резервисти, бидејќи Москва мобилизираше речиси 300.000 од нив во септември 2022 година за офанзивата во Украина.
Законот исто така им забранува на регрутите да ја напуштат Русија од денот кога ќе бидат повикани на воена служба.
За да стапи во сила, законот мора да биде одобрен од Советот на федерацијата, Горниот дом на парламентот и потпишан од претседателот Владимир Путин, што е само формалност.
Со вториот закон, кој пратениците го прифатија во вторник, се зголемуваат казните за прекршителите, па за неодговарање на покана „без оправдана причина“ може да добиете казна и до 300 евра.
Рускиот парламент уште во април усвои закон кој дозволува поканите да се доставуваат преку Интернет наместо лично.
Со месеци Кремљ негираше дека сака да започне нов бран на мобилизација за офанзива во Украина. Претходниот поттикна заминување на десетици илјади Руси од земјата.
