Пендаровски: Да се обединиме околу заедничката цел
Претседателот Стево Пендаровски упати честитка до граѓаните по повод 23 Октомври – Денот на Револуционерната војна на Македонија.
„На денешен ден, пред точно 130 години, шест млади луѓе ја основаа Македонската револуционерна организација, која успеа да ги обедини најхрабрите и најобразованите луѓе на своето време околу една заедничка цел – македонската слободна држава. Оваа млада и напредна генерација успеа да ја зајакне вербата кај македонскиот народ дека само со свои сили може да се бори за слобода и правда“, се вели во честитката на претседателот Пендаровски.
„Иако поради пропагандата, притисоците и соседските аспирации, нашата револуционерна војна имаше успеси и неуспеси, целта остана иста. Илинденското востание ја даде Крушевската Република, Народноослободителната и антифашистичката државотворна војна.
Како што борбата на револуционерната генерација беше за слободна и праведна држава, нашата борба денес мора да биде против корупцијата, непотизмот и криминалот што ја поттикнува недовербата, социјалната неправда и масовното иселување на младите. Исто како пред 130 години, и ние мора да ги надминеме нашите поделби и да се обединиме околу една заедничка цел – демократска и функционална правна држава со еднакви можности за достоинствен живот и напредок на секој граѓанин.
Честит и вековит 23 Октомври – Денот на Македонската револуционерна војна!“, се вели во честитката на претседателот Пендаровски.
