Пендаровски – Танер: Австрија меѓу најгласните поддржувачи за нашите европски интеграции
Претседателот Стево Пендаровски денеска ја прими сојузната министерка за одбрана на Република Австрија, Клаудиа Танер која престојува во официјална посета на Република Северна Македонија, на која е разговарано за севкупната соработка меѓу двете држави во областа на одбраната.
Како што информираат од кабинетот на претседателот Пендаровски, двајцата соговорници разменија мислења и информации за реализацијата на планот за билатерална соработка во одбраната помеѓу двете земји за оваа година, кој содржи повеќе активности во областа на одбранбената политика, воената логистика, кризниот менаџмент, како и учеството на различни обуки и курсеви за стручно усовршување на воен персонал во повеќе области.
Претседателот Пендаровски оценил дека Австрија е меѓу најгласните поддржувачи за нашите европски интеграции и во таа насока се заблагодарил за севкупната австриска поддршка, вклучувајќи го процесот на реформи и развој во областа на одбраната и безбедноста, и изрази очекување за натамошно унапредување на билатералната соработка.
