Претседателот на Еквадор им објави војна на наркобандите поради бранот насилство
– Претседателот на Еквадор вчера прогласи воена состојба против наркокартелите по тридневното насилство во кое бандите се судрија со вооружените сили на земјата.
Во интервју за локалната радиостаница „Радио Канела“, Даниел Нобоа зборуваше за „терористичките акти“ и драматичниот пораст на насилството што ја потресе земјата.
„Ние сме во војна. Не можеме да им се предадеме на овие терористи. Го правиме она што е потребно за да ја елиминираме несигурноста. Овие банди мислат дека ќе го поразат претседателот со упад на телевизиските преноси и земајќи ги безбедносните сили како заложници, но нема да успеат“, рече Нобоа.
Во вооружените судири досега загинаа 11 лица. Властите, исто така, пријавија насилни дејствија, како што се палење возила, блокади и бомбашки напади во голем број провинции.
Покрај тоа, Националната служба за внимавање на лицата лишени од слобода, органот надлежен за затворите во земјата, вчера објави дека затворениците зеле како заложници 139 чувари и друг персонал.
Во вторникот, Нобоа објави состојба на „внатрешен вооружен конфликт“ и прогласи 22 криминални групи активни во земјата за терористички организации. Преку претседателски декрет, тој распореди војници за борбата против криминалните банди кои го тероризираат населението.
Според Нобоа, етикетирањето на групите како терористички организации ѝ овозможува на Владата да преземе различни мерки против нив.
„Сите овие терористички групи се воени цели, и ако сакате да се спротивставите, бидете храбри и борете се против војската директно“, рече тој.
Указот беше потпишан откако вооружени лица упаднаа во сетот на телевизиската мрежа ТЦ во градот Гвајакил за време на пренос во живо, земајќи заложници додека мавтаа со оружје и гранати.
Истиот ден, вооружени мажи ги зазедоа објектите на Универзитетот во Гвајакил, држејќи студенти под закана со оружје.
За нападот на телевизиското студио приведени се 13 осомничени.
Нобоа најави и драстични мерки како полициски час во земјата и репресии на судските службеници.
„Ќе ги сметаме и судиите и обвинителите кои ги поддржуваат идентификуваните водачи на овие терористички организации како дел од нив“, рече тој за време на радиоинтервјуто.
Нобоа, исто така, рече дека земјата ќе започне да ги депортира странските затвореници, особено Колумбијците, за да ја намали затворската популација, истакнувајќи дека затворениците од Колумбија, Перу и Венецуела сочинуваат 90 отсто од странците затворени во земјата.
Според претседателот, оваа недела ќе бидат депортирани до 1.500 колумбиски затвореници.
Бранот насилство во земјата го следи бегството на Хозе Адолфо Масијас, алијас „Ел Фито“, водачот на „Лос Чонерос“, насилна организација одговорна за трговија со дрога во земјата и наводниот вооружен огранок на картелот Синалоа.
Минатата недела, Масијас побегна од својата ќелија во затворот Литорал во Гвајакил заедно со други затвореници од висок профил. Тој отслужуваше 34-годишна затворска казна од 2011 година, откако беше осуден за трговија со дрога, убиства и организиран криминал.
