Спас за милиони: Научниците мислат дека се во потрага по лек за хронично студените раце

Научниците ја идентификуваа причината за хроничната состојба на студените раце што им предизвикува проблеми на милиони ширум светот. Првото истражување од ваков вид покажа дека луѓето со Рејноов синдром имаат мутации во два гена – едниот поврзан со стресот, а другиот со развојот на ембрионот.

„За луѓето кои живеат со оваа состојба, едноставните секојдневни задачи може да бидат предизвик, така што истражувањето како ова, кое значително го унапредува нашето разбирање за болеста на Рејно и улогата што генетиката може да ја игра во нејзиното предизвикување, е од клучно значење“, вели водечкиот истражувач Ема Бламонт.

Според проценките, Рејноовиот синдром погодува два до пет проценти од населението и предизвикува грчеви во крвните садови, со што се прекинува протокот на крв во прстите на рацете и нозете. Заболените често се жалат на пецкање во овие области и бледа кожа.

Истражувачите од Велика Британија и Германија, кои го спроведоа истражувањето, велат дека нивното откритие може да отклучи нови терапевтски опции кои се повеќе насочени кон основната генетска причина за состојбата.

Во истражувањето се користени податоци за генетските и здравствените податоци на 439.294 лица, кои се наоѓаат во Биобанката на Велика Британија. Идентификувани се 5147 лица со дијагностициран Рејноов синдром и откриена е варијација во два гена – ADRA2A и IRX1.

Засега не постои лек за овој синдром, но целта е да се контролираат симптомите со намалување на нивната фреквенција и сериозност.

„Следниот чекор е да се потврдат овие важни наоди во различни групи на население и да се потврдат резултатите преку функционални студии. Доколку се успешни, овие наоди би можеле да ни помогнат да најдеме нови терапевтски патишта за Рејноовиот синдром кои водат до подобри третмани“, додаде д-р Бламонт. .

Резултатите од истражувањето беа објавени во списанието Nature Communications