УКРАИНА ВО ЕУ ПРЕД ЗАПАДЕН БАЛКАН !? Официјален Киев очекува Брисел утре да објави почеток на преговорите ?

Украина се надева дека ќе добие позитивна оценка од Европската унија за напредокот кон евентуалното членство во ЕУ, соопшти во понеделникот за медиумската агенција Reuters украинската вицепремиерка Олга Стефанишња.

Voice of America (VoA) пренесува дека таа изјавила дека официјален Киев ги спровел сите потребни реформи. Извештајот, кој треба да излезе во среда, се очекува да го означи почетокот на преговорите за пристапување на Украина во ЕУ, почнувајќи од декември.

„Би рекла дека оценката дефинитивно ќе биде позитивна бидејќи бевме во постојан контакт со Европската комисија, разговаравме за потезите и преговаравме за чекорите што успеавме да ги спроведеме“, нагласува Олга Стефанишња.

Преговорите за членство во ЕУ траат со години, бидејќи кандидатите мора да исполнат обемни правни и економски критериуми пред да се приклучат. ЕУ, која сега има 27 земји-членки, исто така не сака да прифати земја во војна.

Во Полска, членка на ЕУ, полските камионџии ги блокираа патиштата до трите гранични премини со Украина во понеделникот, протестирајќи против неактивноста на Владата бидејќи тие ги губат работните места поради странската конкуренција од почетокот на руската војна против Украина.

Локалните власти соопштија дека полските камионџии протестираат бидејќи украинските транспортни компании се изземени од барањето дозволи за преминување на полската граница од почетокот на руската инвазија на Украина во февруари 2022 година.

Барањата на камионџиите се, меѓу другото, повторно воведување на ограничувања на бројот на камиони регистрирани во Украина кои влегуваат во Полска и забрана за транспортните компании со капитал надвор од Европската унија.

„Блокадата на патиштата до граничните премини меѓу Полска и Украина е болен нож во грбот на Украина, која трпи руска агресија“, напиша Васил Зварич, украинскиот амбасадор во Варшава, на социјалната мрежа Х (Твитер).