УКРАИНА ВО СОСТОЈБА НА ПРИПРАВНОСТ: Конвојот со возила на Вагнер ја премина границата со Белорусија
Министерството за одбрана на Белорусија во петокот објави дека војниците на Вагнер сега дејствуваат како воени инструктори на силите за територијална одбрана на земјата.
Украинската гранична служба (ДПСУ) денеска потврди дека од соседна Русија во Белорусија пристигнале припадници на приватната воена група „Вагнер“.
DPSU наведува дека во моментов се проценува колку Вагнеровци има во Белорусија, која исто така ја дели границата со Украина, како и нивната точна локација и цели.
Еден непотврден извештај вели дека конвој од околу 60 возила Вагнер рано утринава ја премина границата со Белорусија.
Во јуни, бунтот на членовите на Вагнер го доведе во прашање авторитетот на претседателот на Русија, Владимир Путин .
24-часовниот бунт заврши со договор во кој на борците на Вагнер им беше кажано дека можат да се приклучат на редовната руска армија или да одат во Белорусија.
На лидерот на Вагнер, Евгениј Пригожин , исто така му беше понудено да се пресели во Белорусија, но неговата моментална локација не е позната.
Портпаролот на ДПСУ, Андриј Демченко, во денешното кусо соопштение го потврди присуството на Вагнер во Белорусија.
Тој рече дека украинските граничари „продолжуваат да ја следат ситуацијата“ преку северната граница без да даде дополнителни детали.
Претходно денеска, канал на Телеграм поврзан со белоруски опозициски блогер објави дека голем конвој на Вагнер влегол во Белорусија од Русија.
Белорускиот канал Хајун објави дека возилата, вклучувајќи пикапи, камиони и автобуси , биле следени од белоруската сообраќајна полиција додека се упатиле кон градот Осиповичи, околу 85 километри југоисточно од главниот град Минск.
Белоруските власти, кои го сметаат белорускиот Хајун за екстремистички канал, не ја коментираа оваа информација.
Министерството за одбрана на Белорусија во петокот објави дека војниците на Вагнер сега дејствуваат како воени инструктори на силите за територијална одбрана на земјата.
Во соопштението се наведува дека борците ги обучуваат белоруските сили „во низа воени дисциплини“ во близина на Осиповичи.
