Украина го нападна Крим: Погодена руска воена база, има и жртви?

Украинските разузнавачки претставници соопштија дека нападот ја погодил 126-та руска крајбрежна одбранбена бригада со седиште во Перевални

Во напад на украинско беспилотно летало била погодена руска воена база на Крим, имало жртви, се слушнале експлозии, а затворен е и блискиот пат, соопшти Украинската воена разузнавачка служба.

Официјални лица на украинската разузнавачка служба објавија дека нападот ја погодил руската 126-та крајбрежна одбранбена бригада со седиште во Перевални, град на повеќе од 200 километри од територијата контролирана од Украина, пренесе РТС. 

– Потврдуваме дека имало удар– изјави портпаролот на ГУР, Андриј Јусов, пренесува украинскиот медиум Лига.Нет.

Жителите на Перевални, објавувајќи на апликацијата за пораки Телеграм, известија дека слушнале експлозии од воената база и изјавија дека има жртви.

• Две лица загинаа на полигонот, едно е префрлено во болница во тешка состојба. Ова е информација одозгора, од полигонот – изјави корисник со прекар Абдул Хас, на чија профилна слика е човек во маскирна униформа.

Ројтерс не можеше независно да ги потврди извештаите.