Четворица полесно повредени пожарникари при денешната интервенција на објектот на патот кон Попова Шапка

Со четворица полесно повредени пожарникари заврши интервенцијата за гаснење на огнот во објектот на патот од Тетово кон Попова Шапка, почнат утринава околу 6 часот. Пожарникарите интервенираа повеќе од четири часа само да се изгасне огнот, а останати се таму доколку има потреба за нова интервенција при изнесување на изгорениот материјал.

– Изгоре дел од објектот, каде што се прави мебел и се знае дека има дрвени материјали. Го спасивме од пожар горниот дел. Беше тешко да влеземе и заради топлината. Се интервенираше со десет возила. После четири часа огнот беше изгаснат, но имаме дежурни таму, се следи бидејќи има голема топлина и се вади изгорениот материјал, ако има потреба да се интервенира пак, информира командирот Авни Амети.

Четворица пожарникари имаат стекнато лесни повреди, а меѓу нив и самиот командир.

– Лесно се повредени, со рани на носот, ногата и поради вдишан чад, информираше Амети.

Територијалната противпожарна единица Тетово и понатаму интервенира и во Добарце каде од саботата гори депонија. Денеска интервенции на отворено имале и во Челопек и Теарце.