Ќучјук: Нема да има подобар предлог за Северна Македонија
Уставните измени не се диктирани од Бугарија, туку правилата договорени со ЕУ кои мора да ги следи Северна Македонија, изјави бугарскиот европратеник и известувач за земјава во Европскиот парламент, Илхан Ќучјук.
Во интервју за БНР пред денешната седница на Собранието на Северна Македонија за измена на Уставот, тој нагласува дека поставените услови не се бугарски, туку европски, за што Бугарија и Северна Македонија се договорија за време на француското претседателство, што беше потврдено и од парламентите на двете земји.
„Нема да има промена на ставот на ЕУ – нема желба за тоа, ниту ЕК ниту Советот нема да се обврзат да ги променат правилата неколку месеци пред европските избори. Правилата се такви, договорени се и сите мора да ги почитуваат. Второ – нема да има подобар предлог, бидејќи ова е најдобриот. Никој не му врти раце на Скопје, никој не наметнува дополнителни услови. Ова не е некој бугарски диктат, туку тоа се европските правила кои Северна Македонија мора да ги следи“, вели Ќучјук.
Според него, сето тоа бара политички напор и желба земјата да оди во една или друга насока.
„Северна Македонија е наш сосед и стратешкиот интерес на Бугарија треба да биде дел од НАТО и ЕУ на Балканот. Ова е иднината. Но, изборот е исклучиво за Северна Македонија. Доколку ВМРО-ДПМНЕ не сака да биде на страната на европеизацијата на РМВ, одговорноста е на партијата, но за жал тоа ќе го запре патот на Скопје кон ЕУ на долг период и ќе отвори можност Албанија да биде одвоена од Северна Македонија“, нагласува Ќучјук.
Тој вели дека се согласува со мислењето на премиерот на Северна Македонија, Димитар Ковачевски, дека во случај на неуспех, причините треба да се бараат само во Скопје.
„Мора да има јасен политички знак, односно обединети напори од сите. Дебатата може и треба да биде жестока кога станува збор за внатрешно-политички прашања, но кога станува збор за столбовите на интеграцијата, НАТО и ЕУ – тука треба да има само едно мислење – следејќи ги стратешките приоритети на државата. Таков е бугарскиот пример“, нагласува Ќучјук.
