АЛАРМАНТНИ ИНФОРМАЦИИ ЗА ЦЕЛА ЕВРОПА – Пристигна еден од најлошите видови на мравки во светот – се шири исклучително брзо
Црвените огнени мравки, еден од најинвазивните видови во светот, за прв пат се пронајдени во Европа. Овие увезени инсекти, научно наречени Solenopsis invicta, потекнуваат од Јужна Америка, но во текот на изминатиот век се проширија во поголемиот дел од Соединетите Американски Држави, Мексико, Карибите, Кина и Австралија.
Овие инсекти можат да бидат агресивни кога се вознемирени и да нанесат болен убод, што ја иритира кожата и може да предизвика алергиски реакции. Мравките можат да ги оштетат и посевите и локалните екосистеми, пишува CNN.
Истражувачите објавија дека идентификувале 88 гнезда на црвени огнени мравки распослани на пет хектари во близина на градот Сиракуза на италијанскиот остров Сицилија.
„Solenopsis invicta е еден од најлошите инвазивни видови. Може да се шири алармантно брзо. Откривањето на овој вид во Италија беше големо изненадување, но знаевме дека ќе дојде овој ден“, рекол главниот автор на студијата Матија Менчети, истражувач во Институт за еволутивна биологија во Шпанија.
Иако црвените огнени мравки се откриени во увезените производи во Шпанија, Финска и Холандија, колонија од овој вид никогаш досега не била пронајдена, нагласуваат авторите.
Во предградијата на Сиракуза биле пронајдени колонии. Не е јасно како и кога огнените мравки стигнале таму. Истражувачите веруваат дека инсектите пристигнале на транзитна точка со многу човечка активност, како што е градското пристаниште. Локалните жители ги информираа научниците дека бројот на убоди од мравки е зголемен од 2019 година.
Студијата покажува дека летечките кралици мравки можеле да бидат транспортирани со ветер од област северозападно од Сиракуза, дом на комерцијално пристаниште.
Генетската анализа на мравките откри дека тие најверојатно се шират од САД или Кина, каде Solenopsis invicta е исто така инвазивен вид. Мравките наскоро би можеле да се шират низ Европа, предупредуваат истражувачите, бидејќи околу седум отсто од континентот – вклучувајќи ги големите урбани области како Барселона, Рим, Лондон и Париз – има клима погодна за овој вид, според моделите создадени од студијата.
Студијата беше објавена во понеделникот во научното списание Current Biology.
Инвазивните видови го чинат светот најмалку 423 милијарди долари секоја година бидејќи предизвикуваат истребување на растенија и животни, ја загрозуваат безбедноста на храната и ги влошуваат еколошките катастрофи ширум светот.
