Британија обвини пет Бугари за шпионирање за Русија
Пет Бугарски државјани кои живеат во Велика Британија ќе одговараат за заговор за шпионажа. Станува збор за Бугари кои претходно беа осомничени и уапсени за шпионажа за Русија.
Орлин Русев, Бизер Џамбазов, Катрин Иванова, Иван Стојанов и Вања Габерова следниот вторник ќе се појават пред Судот во Вестминстер, пишува Би-Би-Си .
Бугарските државјани се обвинети за заговор во периодот од август 2020 до февруари 2023 година за собирање информации кои би биле корисни за непријателот.
Обвинението уследи по истрагата на лондонската полиција. Тие се обвинети дека работеле на активни операции во Велика Британија и Европа и собирале и препраќале информации до руската држава.
Со години живееле во Велика Британија. Кога беа уапсени во август, Би-Би-Си објави дека кај нив биле пронајдени лажни документи како лични карти и пасоши. Имале документи и од Бугарија, Франција, Шпанија, Италија, Грција, Словенија, Велика Британија, Чешка и Хрватска.
Кои се Бугарите обвинети за шпионажа?
Орлин Русев има историја на водење бизнис во Русија. Тој се преселил во Велика Британија во 2009 година и поминал три години работејќи во техничка улога во финансиските услуги. Неговиот профил на LinkedIn наведува дека тој подоцна поседувал компанија која се занимавала со разузнавање на сигнали, што вклучува следење на комуникациите или електронски сигнали, пишува Би-Би-Си.
Русев, чија последна адреса е приморска куќа за гости во Грејт Јармут, исто така вели дека некогаш бил советник на бугарското Министерство за енергетика.
Во Хароу, поранешните соседи ги опишаа Бизера Џамбазов и Катрин Иванова како пар. Џамбазов беше опишан како возач за болници, а Иванова се опиша себеси на LinkedIn како лабораториски помошник за приватен здравствен бизнис.
Двојката, која се пресели во Британија пред една деценија, раководеше со социјална организација која им даваше услуги на Бугарите, вклучително и запознавање со „културата и нормите на британското општество“. Според бугарските државни документи на интернет, тие работеле и за изборни комисии во Лондон кои им овозможуваат на граѓаните кои живеат во странство да гласаат на бугарските избори, пишува Би-би-си.
