Еколошка катастрофа во Вишеград: Дрина прекриена со илјадници тони ѓубре
Огромните количини ѓубре во езерото кај браната на хидроцентралата на Дрина претставуваат ризик од еколошка катастрофа во Вишеград и пошироко во сливот на реката Дрина, а активистите за заштита на животната средина нагласуваат дека решението на овој проблем не е лесен и мора да вклучат релевантните органи и служби во Босна и Херцеговина, Србија и Црна Гора.
Грдите слики на реката Дрина прекриена со илјадници тони гуми, метал, пластика и друго ѓубре треба да бидат аларм до надлежните служби за справување и решавање на овој повеќегодишен проблем.
Општинските работници со денови работат на отстранување на ѓубрето, но водата носи нови количини и јасно е дека треба да се вложат дополнителни напори за да се запре загадувањето на Дрина, како и на другите реки во БиХ и регионот.
„Ова е всушност слика за односот кон отпадот во три земји кандидати за членство во Европската унија, а тоа се Црна Гора, Србија и Босна и Херцеговина. Отпадот што се акумулира при подигнување на нивото на водата пред браната доаѓа од овие три земји. Главно од реката Лим која тече низ Црна Гора, потоа преку Србија и потоа Босна и Херцеговина. Кога нивото на реката Лим се зголемува по обилните дождови, водата го собира отпадот од многубројните диви, но и од официјалните ѓубришта лоцирани на самите брегови“, изјави за Анадолу Анес Подиќ, претседател на здружението „Еко акција“.
Нагласувајќи дека овој проблем не е лесно да се реши, Подиќ рече дека решението бара сите три споменати земји целосно да го променат односот кон отпадот.
Посочувајќи дека, со исклучок на медиумите, не гледа никој во регионот да се справува со проблемот со ѓубрето во реката Дрина и нејзините притоки, Подиќ рече дека првиот чекор мора да биде отстранување на дивите депонии на бреговите.
„Ова не е проблем само на Дрина. Овде е видливо само затоа што имаме голема брана на хидроцентралата, но слични проблеми имаме и на другите реки во Босна и Херцеговина. Нашите реки се полни со отпад, а слична е ситуацијата и во Србија и во Црна Гора“, рече Подиќ.
Потсетувајќи дека ѓубрето од Дрина се носи на депонијата во Вишеград, за које рече дека е обична ледина прогласена за депонија и оти самото тоа е еколошки проблем, Подиќ рече дека ова ѓубре претставува ризик и за плодните земјоделски површини кои се наоѓаат во сливот на реката Дрина и од кои се храни цела Босна и Херцеговина.
„Отпадот од реката влегува во нашиот синџир на исхрана со непроценливи последици. Меѓутоа, со недоволните контроли на храната, ние навистина не знаеме што јадеме. Неорганизираното депонирање на отпад може да заврши со големи последици по здравјето на луѓето“, предупреди Подиќ.
Тој исто така остро ги критикуваше политичарите кои покажуваат негрижа кон овој проблем и кои речиси никогаш не повикуваат на меѓудржавна соработка за прашањето за зачувување и заштита на животната средина.
