Излегоа чизми од снегот: Мразот на Алпите се стопи и го откри телото на планинар кој исчезна пред 40 години
Скоро секое лето, мразот што се топи открива нешто или некого
Човечките останки, пронајдени на глечер недалеку од швајцарската планина Матерхорн, припаѓаат на германски алпинист кој исчезнал во 1986 година, а ова откритие е само една од долго чуваните тајни на алпските глечери кои се топат поради климатските промени .
Телото на почетокот на месецот го пронашле алпинисти кои го преминале глечерот Теодул, над Зермат, откако забележале чизми и дерези како излегуваат од мразот.
ДНК анализата потврди дека се работи за германски алпинист кој исчезнал пред 37 години. Потоа беше започната опсежна потрага по него, но таа не вроди со плод.
Полицијата не го прецизираше неговиот идентитет, само посочија дека во моментот на исчезнувањето имал 38 години.
Глечерот Теодул, како и другите глечери низ Алпите, видливо се намалува во последниве години. Теодул е дел од целогодишниот скијачки регион Зермат, највисокиот во Европа.
До 80-тите години на минатиот век, Теодул сè уште бил поврзан со соседниот глечер Горнер, но сега тие се одвоени.
Скоро секое лето, мразот што се топи открива некого или нешто што исчезнало пред неколку децении. Така минатата година се појавија остатоците од авионот кој се урна во 1968 година.
