Косово: Започната „Информативната кампања за визна либерализација“
– Косовскиот премиер Албин Курти на плоштадот Скендербег во Приштина ја започна „Информативната кампања за визна либерализација“, која за Косовците ќе стапи на сила на 1 јануари 2024 година.
На отворањето на кампањата, на граѓаните на Косово им беа поделени летоци за подигнување на свеста за да можат да ги добијат потребните информации и целосно да разберат што треба да имаат кога ќе одлучат да патуваат во земјите од Шенген зоната.
Премиерот Курти рече дека процесот на визна либерализација трае предолго и дека е предоцна за граѓаните на Косово.
Тој нагласи дека овој процес е заслуга на сите граѓани и дека борбата против криминалот и корупцијата се меѓу причините за постигнување укинување на визниот режим за Косово.
„Граѓаните, сите ние, мора да бидеме внимателни бидејќи кршењето на правилата, дури и поединечно, може да доведе до казни и забрана за влез во Шенген зоната. Уште еднаш ви честитаме за ова многу големо достигнување за нашата земја и отсега ќе да може слободно да патуваме, нешто што одамна го заслуживме, но стапува на сила и ќе почне да се применува од 1 јануари следната година“, истакна Курти.
Во оваа кампања, меѓу другото, беше најавено дека визната либерализација има свои правила што мора да се почитуваат, како ненадминување на 90 дена престој во Шенген зоната во рок од 180 дена, поседување валиден пасош, цел на патување, доволно финансиски средства и, исто така, дека визната либерализација не значи право на работа или студирање.
„Прекршувањето на правилата за визна либерализација може да доведе до сериозни последици, вклучително парични казни, забелешка во пасошот и забрана за влез во Шенген зоната до пет години“, се вели во едно од објаснувањата дадени до граѓаните.
Граѓаните на Косово од 1 јануари 2024 година ќе можат без виза да патуваат во Шенген зоната за краткотраен престој од најмногу 90 дена во рок од шест месеци, но без можност за вработување или студирање.
Косовците ќе можат да патуваат како туристи, да ги посетуваат пријателите или семејството, да учествуваат на културни или спортски настани, на деловни состаноци, на лекување, на краткорочни образовни програми и слични активности.
Од 1 јануари 2024 година, оние што имаат косовски пасоши ќе можат да патуваат во Шенген зоната без визи за краткотраен престој, но безвизниот режим нема да важи за Шпанија бидејќи оваа земја не ги признава косовските пасоши. Безвизниот режим вклучува и земји што не се членки на ЕУ, но се дел од Шенген зоната – Швајцарија, Норвешка, Лихтенштајн и Исланд.
Косово во моментов е единствена земја на Западен Балкан чии граѓани не можат да се движат без виза во Шенген зоната.
