Мулачка: Во шемата на Онкологија биле директори, лекари, сестри, но и секретарки, возачи и чувари

Се започна пред 6-7 месеци, по разговор со неколку вработени на Клиниката за онкологија, на кои најверојатно им дошло преку глава она што се случувало таму, вели во интервју за „Макфакс“ Ирена Мулачка, новинарка на „Фокус“ која е авторка на серијал текстови за скандалот со Онкологија, по кои беше покрената предистражна постапка.

–Многу повеќе од јасно е кој го правел тоа и кои лица се вмешани во ова – истакнува Мулачка, додавајќи дека целата шема за скандалот не можела да се одвива без врзан потпис на медицинскиот и на економскиот директор.

Појаснувајќи како се одвивала целата шема на злоупотреба на скапите лекови на Онкологија, дали истите биле препродавани, кратени и растворани со физиолошки раствор, таа вели:

„Тука има една шема на луѓе, но дали инструкцијата била од самиот лекар или тоа било одлука само на одделенските сестри, а дека тоа се случувало го докажува и моменталната ситуација на Клиниката. Просторијата во која се растворале лековите била отворена.

Според тоа што јас го знам, внатре биле по десет сестри и немало контрола. Дека може да манипулираат, може, дека може да биде без инструкција на лекарите, може, а може да биде и во договор. Еве, јас знам, дека еден од лекарите, ветувал на многу од пациентите во терминална фаза терапија“.

Според неа, на фамилиите на пациентите кои биле пред умирање им биле ветувани скапи лекови од странство, а наместо тоа им била давана „волшебна комбинација“ од антибиотици и витамин Ц, со која биле освежувани и залажувани дека им се продолжува животот.

Според нејзините сознанија, лековите кои се злоупотребени од Онкологија се препродавале најверојатно на Косово, а во шемата учествувале директори, лекари, медицински и одделенски сестри, па и секретарки, благајници, возачи и чувари.

Во врска со мајката на поранешниот економски директор на Онкологија, Нехат Нухиу, пак, таа вели дека неговата мајка не била болна од карцином, но во медицинската историја е напишано дека боледува од рак на бели дробови, а од Клиниката излегува со дијагноза анемија.