Несогласувања во германската Влада во врска со буџетот за 2024 година

– Германскиот министер за финансии Кристијан Линднер изјави дека планира да се справи со проблемот со големите расходи во буџетот за идната година за да го поправи структурниот дефицит предизвикан од пандемијата „Ковид-19“ и енергетската криза.

„Имаме огромен проблем со потрошувачката. Изминатите десет години ни помогнаа ниските каматни стапки и растот на буџетските приходи, што значеше дека и самиот државен буџет се движи во насока на рамнотежа“, тврди Линднер во интервју за неделното издание на весникот „Ди Велт“.

Тој нагласи дека ситуацијата во меѓувреме се променила, за прв пат по повеќе од десет години треба да се консолидираат. Додаде дека повисоките задолжувања и даноците не се прифатливи опции. 

Линднер од Слободните демократи и министерот за економија Роберт Хабек од Зелените се судрија во февруари околу плановите за буџетот за следната година.

Изразувајќи стравувања кај Зелените дека нема да има доволно пари за некои планирани проекти, бидејќи владата инсистира на строги регулативи за задолжување, Хабек ги критикуваше предлозите на Линднер.

Министерот за економија го повика својот колега еднострано да не дава приоритет на трошоците во одредени области, вклучително и вооружените сили и даночните намалувања во туристичката индустрија, велејќи дека неговата партија не може да ги прифати буџетските планови.

Линднер јавно го отфрли неговиот повик, а во неделата тврдеше дека коалицијата не е блокирана, туку е во тешка ситуација. Тој исто така рече дека во средата го информирал канцеларот Олаф Шолц дека нема да може да ги презентира основите на предлог-буџетот за 2024 година на следната владина седница, бидејќи се уште не е постигнат целосен договор.

Министерството за финансии неодамна соопшти дека контурите на нацртот треба да бидат готови до јуни и покрај зголемените тензии.