Путин и Ким Џонг Ун разменија писма – Северна Кореја дава муниција за војната во Украина? Белата куќа на нозете!
Белата куќа денеска објави дека има нови разузнавачки информации кои покажуваат дека рускиот претседател Владимир Путин и севернокорејскиот лидер Ким Џонг Ун размениле писма, како и дека Русија побарала од Северна Кореја муниција за војната во Украина.
Портпаролот за национална безбедност на Белата куќа Џон Кирби го детализираше „најновото откритие“ само неколку недели откако Белата куќа соопшти дека рускиот министер за одбрана Сергеј Шојгу ги повикал севернокорејските власти да ја зголемат продажбата на муниција во Москва за време на неодамнешната посета на Пјонгјанг.
Кирби рече дека Русија бара дополнителни артилериски гранати и други основни материјали за да ја зајакне својата одбранбена индустриска база, пренесува Асошиетед прес.
Тој додаде дека писмата што лидерите ги размениле по посетата на Шојгу биле „повеќе на површинско ниво“, но оти преговорите меѓу Русија и Северна Кореја за продажба на оружје напредуваат.
„По посетата на Шојгу, друга група руски функционери отпатуваа во Пјонгјанг за понатамошни разговори за потенцијалните зделки за оружје меѓу КНДР и Русија“, рече Кирби, користејќи го акронимот за Демократска Народна Република Кореја.
Тој одби да прецизира како американските власти ги собрале разузнавачките информации.
Непосредно пред Белата куќа да објави нови информации за преговорите за вооружување на Северна Кореја и Русија, Северна Кореја лансираше балистичка ракета кон нејзините источни води, соопшти војската на Јужна Кореја.
Лансирањето се случи еден ден пред завршувањето на 11-дневните заеднички воени вежби меѓу Јужна Кореја и САД, што Пјонгјанг претходно ги осуди.
