Ребра од растително потекло и вегански коски наскоро на западниот пазар

До крајот на август на пазарот во Европската унија, Велика Британија и САД ќе се појават ребра од растителна основа и вегански коски за јадење, соопштија од компанијата за производство на веганска храна.

Според извештаите, идејата за коски за јадење, произведени од „Juicy Marbles“, започнала со тоа што компанијата прво сакала да ги компостира, но потоа сфатила дека и тие можат да се јадат, објави Гардијан.

Цената допрва треба да се утврдува, но сигурно ќе биде повисока од обичните ребра, кои генерално се евтин месен производ.

Компанијата допрва треба да собира повратни информации од клиентите на првата серија производи, со цел да ги прилагоди рецептот, името и пакувањето пред целосното пуштање во продажба.

Гардијан забележува дека намалувањето на традиционалната потрошувачка на месо во богатите земји, каде луѓето веќе јадат повеќе црвено месо отколку што е здраво, е од витално значење за справување со климатската криза.

„За некои, коските од растенијата можеби се идеолошка провокација, но овие работи не треба да се сфаќаат премногу сериозно“, вели Владимир Мицковиќ, ко-основач на „Juicy Marbles“, чие седиште е во Словенија. „Забавно е. Коските ве повикуваат да јадете со раце и да ја споделите [храната] со целата маса“. 

„Постои култура на славење, споделување и чувство на припадност кога станува збор за месото [и] секој што не јаде месо може да се чувствува исклучен од културните традиции“, рече тој. „Затоа ги избравме ребрата како наш следен производ. 

Првата серија ребра на база на соја ќе биде пуштена во продажба на крајот на август. „Сакаме да собереме што е можно повеќе повратни информации, бидејќи пријателите и семејството можат да ви дадат искрени критики. Ребрата ќе бидат во општа продажба на почетокот на 2024 година, додаде тој.