Се менува бојата на океанот: Дали наскоро ќе можеме да го гледаме синото море само на разгледници?
Експертите забележаа позелени нијанси проучувајќи ги старите сателитски снимки и заклучија дека 56 отсто од површината на океанот е позелена отколку што беше на почетокот на векот…
Во изминатите дваесет години океаните се повеќе ја менуваат бојата, покажува новото истражување, пренесува британскиот научен портал Phys.org, додавајќи дека причината за тоа е најверојатно човечката активност. Доколку продолжи таквиот тренд, интензивната сина боја на морето, која е карактеристична за тропските предели, може да се види само на разгледниците во некои делови од светот.
„Генерално, океаните на ниска ширина станаа позелени во текот на изминатите 20 години“, се вели во извештајот објавен во списанието Nature. Симулациите кои ги предвидуваат последиците од климатските промени на Земјата пред неколку години сигнализираа дека океаните би можеле да почнат да ја менуваат бојата, но сега научниците го потврдуваат тоа.
„Да се види дека ова всушност се случува не е изненадувачки, туку застрашувачки. И овие промени се во согласност со климатските промени предизвикани од човекот“, рече коавторот на студијата Стефани Дуткиевич во соопштението за печатот за Технолошкиот институт во Масачусетс.
Експертите забележале позелени нијанси проучувајќи ги старите сателитски снимки и заклучиле дека 56 отсто од површината на океанот е позелена отколку што била на почетокот на векот.
Иако извештајот не наведува пошироко влијание врз луѓето, студијата открива дека промената на бојата на океанот е веројатен знак дека морскиот живот се менува.
„Не знаеме што го предизвикува овој тренд. Причината може да биде органски материјал, промени во видот и количината на фитопланктон… сите овие аспекти можат да влијаат на бојата на океанот“, изјави коавторот на студијата Емануел Бос за EOS Science. News, додавајќи дека се надева дека наскоро ќе ја открие причината за промените.
