6 КЛУЧНИ ТОЧКИ НА ГЕРМАНСКАТА СТРАТЕГИЈА ЗА КИНА: Берлин претстави план за намалување на зависноста од Пекинг

Германија има стратегија за намалување на зависноста од Кина, а тоа се шест клучни точки.

Германија за првпат ја претставува својата стратегија за односите со Кина, односно начините на кои би можела да ја намали зависноста од Пекинг. Областите оценети како клучни се резервите на суровини, заштитата на инфраструктурата, сајбер безбедноста и борбата против дезинформациите.

Стратегијата, која оваа недела ја претстави германската министерка за надворешни работи Аналена Бербок, вели дека клучните технологии како што се полупроводниците, вештачката интелигенција и зелените технологии се сè поважни за напредокот и безбедноста.

Германскиот канцелар Олаф Шолц објави на Твитер дека целта на владата не е целосно да се одвои од Пекинг, туку да дејствува понаметливо кон Кина кога станува збор за технологијата. Ова се шесте клучни точки на стратегијата.

1. Суровини
   Германската стратегија признава дека зависноста од Кина е голема, особено кога станува збор за минерали од ретки земји и разни метали. Европа ги увезува овие суровини, клучни за производство на чипови, од Кина во дури 94% од случаите. Таквата зависност веќе предизвика главоболки за Берлин, откако Пекинг објави дека ќе воведе контрола на увозот на галиум и германиум, две клучни суровини за производство на полупроводници.

Затоа, стратегијата се обидува да најде начин да го направи увозот поразновиден и „да ги поддржи партнерите кои ги имаат овие суровини во создавањето поголема вредност“.

Берлин веќе е во центарот на европските напори за враќање на производството на полупроводници на стариот континент, а компанијата „Интел“ неодамна најави дека ќе изгради две „мегафабрики“ во Саксонија.

2. Критична инфраструктура
   Германската стратегија ја оценува телекомуникациската инфраструктура како критична за националната безбедност и го нагласува фактот дека јавните телефонски мрежи 5G веќе се заштитени со посебни закони. Но, Германија веќе се најде на удар на критики затоа што бавно ја отстранува опремата од ризичните добавувачи како Huawei. Стратегијата за ова прашање не предлага драматична промена на пристапот, но Берлин ќе оценува сектор по сектор, врз основа на нивото на критичност. Списокот на критични функции за енергетскиот сектор се очекува да биде објавен до крајот на оваа година.
3. Технолошка независност
   Берлин сака да не зависи од „трети земји со кои не ги дели основните вредности“. За да биде во чекор со Кина, Берлин ќе инвестира повеќе во дојдовните технологии и „стратешки ќе предвиди“ методи за нивно идентификување. Развојот и истражувањето ќе добијат повеќе средства, а заштитата на патентите ќе се подобри.

Во стратегијата, федералната влада ја повторува својата посветеност на регулативите на ЕУ како што се Законот за чипови, Законот за вештачка интелигенција, Законот за податоци и управување со податоци.

4. Сајбер безбедност и шпионажа
   Германската федерална влада не прави разлика меѓу дигиталната и аналогната безбедност, туку ги смета за „две страни на иста монета“. Документот дополнително предупредува на кинески сајбер агенти кои се вклучени во економска и академска шпионажа со цел да се добијат тајните на германските корпорации.

Европската унија моментално работи на ревидирана рамка за својата сајбер дипломатија, каде Берлин ќе придонесе и „ќе соработува со партнери и истомисленици, така што меѓународните режими за сертификација ќе се користат за проценка на безбедноста на информатичката технологија“.

5. Дезинформации
   Стратегијата ја повторува намерата на Германија да и помогне на Украина и ја нагласува неопходноста од борба против дезинформациите и „лажните наративи“. Берлин, исто така, предупреди дека германската демократија може да настрада поради скриеното промовирање на интересите наметнати од кинеските власти. Беше споменат и актот за регистрација на лобисти со цел да се направат напори за потранспарентно застапување на интересите.
6. „Мешање“ и влијание
   Германските училишта, универзитети, професори и истражувачи ќе се погрижат институтите да го задржат „принципот на слобода на науката, истражувањето и академската настава“. Мора да ја имаат предвид максималната транспарентност на активностите, „особено кога владините средства се користат за соработка со Кина“.

Берлин, исто така, сака да се погрижи суверенитетот на земјата да не биде загрозен од „акти на транснационална репресија насочени кон кинеските граѓани“. Јасно ќе таргетира одредени ќелии и организации кои се поврзани со Кинеската комунистичка партија во Германија.