Советот за безбедност на ОН ја отфрли руската резолуција за војната меѓу Израел и Хамас
Советот за безбедност на ОН (СБСБ) ја отфрли руската резолуција со која се бара прекин на огнот за да се стави крај на војната меѓу Израел и Хамас.
Делегатите одбија да поддржат нацрт-документ кој не го осудува Хамас по ненадејниот напад врз Израел во кој загинаа повеќе од 1.400 луѓе.
Советот се состана додека Израел се подготвува за копнена офанзива на Појасот Газа, откако во артилериски и воздушни напади загинаа најмалку 2.750 Палестинци.
Само четири земји гласаа заедно со Русија за предложениот нацрт, а четири други, вклучително и САД, гласаа против, додека шест беа воздржани.
Друг нацрт предложен од Бразил, кој недвосмислено го обвинува Хамас, се чини дека има поширока поддршка и се очекува да биде изгласан вечерва, велат дипломатите.
Амбасадорот на Русија во ОН, Василиј Небензја, изјави дека и покрај неуспехот, резолуцијата го охрабрува Советот да преземе акција, пренесува Бета-Франс прес.
„Тоа придонесе за иницирање суштинска дискусија во Советот за безбедност на оваа тема. Без нашето охрабрување, сè би било ограничено на празни дискусии“, рече амбасадорот, пренесе агенцијата Франс прес.
ОК, која им се придружи на САД во гласањето против рускиот предлог, ја критикуваше Москва за недостигот на консултации и напори за постигнување консензус.
„Не можеме да поддржиме резолуција која не ги осудува терористичките напади на Хамас“, изјави британската амбасадорка Барбара Вудворд.
Објаснувајќи ја одлуката за гласање против, американската амбасадорка во ОН, Линда Томас-Гринфилд, ја критикуваше Русија што не го спомнува Хамас во документот и оцени дека тој обезбедува покритие за терористичка група која „брутализира невини цивили“.
Таа рече дека тоа е лицемерно.
Амбасадорката на САД додаде дека се согласува советот да преземе нешто, но правилно.
Таа оцени дека Хамас ја предизвика хуманитарната криза во Газа и дека не може да се дозволи вината да ја префрли на Израел и да го оправда Хамас за „децениската суровост“.
Амбасадорот на Израел во ОН, Гилад Ердан, праша дали Советот ќе ја прифати борбата за цивилизација или ќе поттикне „геноцид од џихадисти кои имаат за цел да ги убијат сите неверници“.
Палестинскиот амбасадор во ОН, Ријад Мансур, рече дека морална должност на Советот за безбедност на ОН е да се обиде да го спречи израелското бомбардирање на Појасот Газа, во кое секој час гинат 12 лица.
Агенцијата на ОН за помош на палестинските бегалци предупреди дека Појасот Газа се соочува со хуманитарна катастрофа без преседан доколку не се обноват резервите на вода и виталните добра.
